Kandela na fakel di Cat Cracker na Refineria Isla

Published on February 16, 2018

Ayera anochi alrededor di 23:15 ora a surgi un kandela na e fakel di e Cat Cracker na Refineria Isla. Operadornan di e área di Cat Cracker mesora a aktivá e sistema di alarma di kandela i na mes momento e kuerpo di bombero di Isla a bai na e área di emergensia p’asina ataka e kandela. Tabata trata di un bola di kandela ku a sali for di e kabes di e fakel i kai abou rònt di e fakel. Aparte di e bola di kandela ku a sali for di e kabes di e fakel, a surgi un kandela un tiki mas abou di e kabes di e fakel mes tambe.

A instalá un tim di investigashon ku lo bai profundisá den kousa di e insidente i tambe un ekipo pa determiná e posibel daño ku e fakel a sufri. E planta di Cat Cracker mes no a sufri ningun daño.

Loke Refineria Isla por raporta konkretamente na e momento aki ta:

  1. A bati alarma pa 23:15 ora i anochi. E kandela na suela a keda kompletamente pagá pa 23:20 dor di kuerpo di bombero di Isla mes.
  2. E kandela ku a surgi un tiki mas abou di e kabes di e fakel a sigui kima, te ora ku esaki mes a paga alrededor di 03:30 ora di mardugá.
  3. No tabatin ningun persona leshoná.
  4. Loke a kima ta gasolin i otro produktonan liviano ku no a kousa molèster di holó pa habitantenan den bisindario.
  5. Refineria tabatin kontakto ku kuerpo polisial i a notifiká esaki ku no tabatin peliger pa komunidat i ku no tabatin nesesidat pa sera e kayanan rònt di refineria.
  6. Departamentu di Medio Ambiente entretantu tambe a bin hasi nan inspekshon.
  7. E stashonnan di midishon di airu den e área konserní tampoko no a indiká ningun oumento di SO2.
  8. Tin sufisiente, gas, gasolin, kerosin i diesel pa abastese merkado lokal.

Refineria Isla ta gradisí su kuerpo di bombero i tur su trahadónan ku a yuda den pagamentu di e kandela rapidamente.

Na momentu ku tin informashon adishonal Refineria Isla lo sigui informá komunidat.

Departamentu di Relashon Públiko
Refineria Isla Curaçao B.V.
16 di februari 2018

< Back