Pèrdida di “catalyst’ durante e proseso di saka esaki for di e planta di Cat Cracker.

Published on February 21, 2018

Refineria Isla mester a para su planta di Cat Cracker pa motibu di e kandela na e fakel di Cat Cracker. Na momentu ku para e planta di Cat cracker mester saka e “catalyst” ku tin den dje pa evitá ku esaki ta bira duru. Na momentu ku a hinka airu den e planta pa por saka e “catalyst” pa manda esaki den un kònteiner (“hopper”), nos a eksperensia pèrdida di “catalyst”. Esaki a kousa molèster den barionan pabou di nos refineria.

“Catalyst” ta un puiru fini ku Cat Cracker ta usa pa aselerá e proseso pa produsí gasolin. Por limpia e “catalyst” dor di spùit’é ku awa.

Kontrali na loke a sali den algun medio di komunikashon, ku ta indiká ku “catalyst” ta tóksiko, nos por bisa ku esaki no ta kuadra ku realidat. Si un persona bini den kontakto ku “catalyst” esaki por kousa iritashon temporal di wowo i kútis.

Refineria Isla ta pidi su diskulpa sinsero na tur hende ku di un òf otro manera a hañ’é ku “catalyst” na su kas òf negoshi.

Departamentu di Relashon Públiko
Refineria Isla Curaçao B.V.
21 di febrüari 2018

< Back