Refineria Isla Curaçao B.V. a partisipá na dia di estudio di Minister di SOAW

Published on April 12, 2018

Willemstad – Djamars dia 10 di aprel último, un ekipo di Refineria Isla a partisipá na un dia di estudio ku a keda organisá pa Minister di SOAW, señor Hensley Koeiman, pa  yega na resolushonnan konkreto pa ku partisipashon di trahadónan lokal i trahadónan estranhero den trabounan ku sa tin riba tereno di Refineria Isla.

Durante di e dia di estudio aki, tabatin presentashon di entre otro e sindikato SGTK, e asosashon di kontratistanan AAV, profeshonalnan di departamento di labor i Refineria Isla.

Den su presentashon, e gerente di rekurso humano di Refineria Isla, señor Lucas Beaujon, a presentá e retonan ku Refineria Isla ta enfrentá pa sertifiká trahadónan lokal ku por traha riba tereno di refineria Isla durante di trabounan di mantenshon.

Pa por traha riba tereno di Refineria Isla, tantu trahadónan lokal komo esnan estranhero mester ta sertifiká den nan fishi pa asina garantisá seguridat i produktividat. Fishinan ku Refineria Isla ta sertifiká ta entre otro plant mechanic (mekániko di planta), scaffolders (trahadó di stelling) i welders (lasdo). Ta sertifiká kada fishi na diferente nivel. E nivel di sertifikashon ta dependé di e hende su abilidat i eksperensia ku e ta demonstrá pa medio di un eksámen teorétiko i práktiko. E trahadónan ku sertifikashon por haña trabou serka kontratistanan na momento ku e kontratistanan aki tin trabou riba tereno di Refineria Isla.

Pa duna un ilustrashon konkreto, Refineria Isla a presentá e datonan di plant mechanic. Na aña 2016/2017, Refineria Isla, usando su propio medionan, a entrená plant mechanic i pipe fabricators ku ya tabata trahando serka algu kontratista lokal. Aktualmente tin 400 yu’i Kòrsou ku a optené un sertifikashon di Refineria Isla ku ta hasi nan kualifiká pa por traha pa kontratistanan ku ta hasi trabou riba tereno di Refineria Isla.

Di e 400 hendenan lokal menshoná ariba, 348, pues 87% tin solamente e nivel mas abou di sertifikashon komo plant mechanic. Meskos tambe, 115 di esnan sertifiká komo plant mechanic, kual ta 29%, tin mas di 60 aña di edat. Por sierto tin algun trahadó hasta riba 70 aña. Di esnan sertifiká, solamente 21% tin ménos di 30 aña.

Algun di esnan presente, a keda asombrá pa e sifranan aki, pasombra ta biba e persepshon ku tin hopi hende lokal kalifiká ku no por haña trabou riba tereno di Refineria Isla. Echo ta ku e sifranan ta mustra un realidat otro for di e persepshon. E sifranan presentá a mustra ku e merkado lokal ainda tin problema pa produsí sufisiente hende sertifiká pa traha riba tereno di Refineria Isla. P’esei Refineria Isla ta komprometé pa sigui kooperá ku tur instansia pa sigui desaroyá trahadónan pa e área metalúrgiko.

Klousurando, Refineria Isla a trese pa dilanti ku na e momentonan aki mes, Refineria Isla ta entrenando 12 plant mechanic na nivel intermedio den un programa ku ta dura 18 luna. E espektativa ta ku na final, e plant mechanic nan aki lo por drenta servisio di kontratistanan lokal i asina haña trabou riba tereno di Refineria Isla den proyektonan di mantenshon.

Foto 1:
Gerente di Rekurso Humano di Refineria Isla presentando e sifranan.

 

 

 

 

 

 

 

Foto 2:
Presidente di SGTK señor Alcides Cova kombersando ku gerente di rekurso humano di Refineria Isla señor Lucas Beaujon.

 

 

 

 

 

 

 

Departamentu di Relashon Públiko
Refineria Isla Curaçao B.V.
12 di aprel 2018
www.refineriaisla.com

 

< Back