Refineria Isla Curaçao B.V. ta lamentá posishon di Curoil

Published on May 22, 2018

Komo kompania responsabel, pa Refineria Isla ta importante pa komunidat ta trankil sabiendo ku Refineria Isla tin i ta entegando produkto petrolero pa e merkado lokal manera ya a bini ta hasi pa mas ku 30 aña. Pa e motibu aki Refineria Isla ta presentá un relato kronológiko di e desaroyonan di e último dianan.

Dia 13 di mei 2018, durante di un reuda di prensa, Curoil a indiká di tabata tin un stòk di 3 luna pa suministro di produkto petrolero pa ku komunidat di Kòrsou i Boneiru. Curoil tambe a indiká di tin opshon di otro suplidornan ku lo por kumpli ku nan nesesidatnan.

E siguiente dia 14 di mei, Curoil sorpresivamente a entamá un huisio sumario pa por haña klaridat den ki kuadro Refineria Isla lo mester sigui kumpli ku palabrashonnan vigente pa ku suministro di produkto petrolero.

Djabièrnè 18 di mei, Refineria Isla riba petishon di e propio Curoil, a entregá mas di 3 mion florin na produkto na Curoil. Awe 22 di mei tambe Refineria Isla a hasi entrega na Curoil.

Kontrali na e impreshon ku ta purba krea durante di e último 3 dianan, Refineria Isla tabata den kontakto kontinuo ku Curoil pa negoshá kondishonnan di entrega i na ningun momento so, a ninga di hasi entrega.

Refineria Isla tin un relashon di mas di 30 aña ku komunidat di Kòrsou i ku Curoil. Semper Isla a kumpli. Ta pa e motibu aki ta di lamentá e posishon ku Curoil a asumí durante e ùltimo dianan.

Semper konsiente di su lugá den komunidat di Kòrsou, Refineria Isla lo sigui traha pa mantené relashonnan konstruktivo ku komunidat en general i ku tur kompania lokal ku ta dependé di Refineria Isla pa nan operashon.

Departamentu di Relashon Públiko
Refineria Isla Curaçao B.V.
22 di mei 2018

< Back