Refineria Isla ta lamentá e intrankilidat ku ta ser kreá dor di e propio Presidente di AAV.

Published on September 7, 2017

Refineria Isla a tuma nota di deklarashonnan hasi den entrevista ku Presidente di AAV, sr. Mike Willem, i tambe publikashon den korant. E deklarashonnan aki ta kontené informashonnan inkorekto ku únikamente ta sirbi pa krea tenshon den nos komunidat. Refineria Isla ta lamentá e intrankilidat ku ta purba hinka den nos komunidat i tambe ku ta mal informá trahadónan di kontratista ku ta laborá riba tereno di Isla.

Den reunionnan ku Minister di Labor, sr. Hensley Koeiman, kaminda tabata presente AAV i tambe SGTK, Refineria Isla a trese aklarashon riba e informashonnan inkorekto i a desbaratá tur e informashonnan inkorekto i ku karakter negativo ku ta kousa intrankilidat riba Isla i den pueblo di Kòrsou.

E situashon ku CD-3 i otro plantanan asosiá kuné ku no ta den operashon, no tin impakto riba trabounan di kontratista. Al kontrario, kontratistanan di AAV ta trahando den CD-3 i tambe Isla ta hasi uzo di e oportunidat ku sierto plantanan ta pará pa hasi otro mantenshonnan ku kontratistanan di AAV ku ta traha den e áreanan. E kontraktnan pa trabou den e áreanan di refineria, semper a bai a base di destaho entre solamente e kontratistanan ku ta inskribí na Refineria Isla. Pa loke ta e kontraktnan ku ta vense fin di aña 2017, pues ku no ta ta ser kanselá riba un forma abrupto manera ta pretendé eróneamente den e medionan di komunikashon, Refineria Isla korektamente a informá e kontratistanan en kestion ku e kontraktnan ta yegando na nan fecha di vensementu. Pa loke ta e 4 kontratistanan ku ta hasi trabounan mekániko i ku tin tur e  kontraktnan den e áreanan, tur kuater ta miembro di AAV. Ademas Refineria Isla a informá AAV, SGTK, i Gobièrnu, ku lo tene e destaho eksklusivamente entre e 4 kontratistanan aki atrobe. Pues lagando otro kontratistanan di AAV i otronan for di e proseso di destaho. Esaki pa trahadónan di kontratista ku ta trahando den e áreanan por tin trabou. Refineria Isla semper a boga pa trabou pa yunan di tera promé i a bin ta hasi esfuersonan pa sigui forma mas yunan di tera pa por hasi e trabou.  Trahadónan di eksterior ta ser buska netamente dor di e kontratistanan mes i a traves di historia mayoria trahadó estranhero a ser buska dor di kontratistanan afiliá na AAV.  Ta p’esei Isla ta lamentá ku e intrankilidat ta ser krea dor di e propio AAV.  Hustamente pa protehá trahadónan lokal, Gobièrnu a instituí un komishon kaminda AAV ta forma parti di dje huntu ku SGTK. Meta di e komishon ta pa via di SOAW duna  konseho na Gobièrnu si mester duna pèrmit na estranheronan  pidi dor di e propio kontratistanan.  Tur esaki pa garantisá  ku yunan di tera ta bin na remarke promé pa trabou. Pues Isla ta lamentá  ku AAV ta tira piedra i despues skonde man!

Refineria Isla ta spera ku instansianan i òf Gobièrnu ku ta bon na altura di loke ta pasando sali informá e pueblo pa evitá ku otronan ta krea intrankilidat den e pueblo, afektando pas laboral i inklusive daña e esfera ekonómiko ku pais Kòrsou ta trahando riba dje pa mas trabou pa e  yunan di tera.

Departamentu di Relashon Públiko
Refineria Isla Curaçao B.V.
7 di sèptèmber 2017

< Back