Refineria Isla ta sigui ta preokupá pa konfiabilidat di entrega di utilidat

Published on June 19, 2018

Djaluna anochi alredor di 21:30 e sistema di alarma di Refineria Isla a aktivá pa motibu ku e preshon di airu ku CRU ta entregá na Refineria Isla a kai drástikamente. E problema aki a dura te ku djamars mainta 10:00. Manera ya ta konosí, aparte di stom, awa i koriente, CRU tambe ta responsabel pa entregá Refineria Isla airu komprimí.

E airu ku CRU ta entregá na Refineria Isla entre otro ta wòrdu usá pa instrumentonan delikado di midishon di proseso. Pues preshon di airu ta sumamente importante pa por mónitòr i ahustá operashon di e plantanan.

Dos siman pasá, Refineria Isla mester a para operashon di plantanan na momento ku e preshon di stom ku CRU tabata entregando a subi inesperá. Ora ku a bai pone plantanan bèk den operashon, a surgi un desperfekto na e planta konosí komo Platformer pa kual motibu a para produkshon.

Aunke ku aktualmente no tin produkshon, diferente unidat ta sirkulando riba temperatura haltu pa mantené nan mes den kondishon pa por operá na momentu ku kuminsa bèk ku produkshon. Pa por hasi esaki, ta importante pa tin sufisiente utilidat na disposishon di e plantanan.

E fayo den entrega di airu komprimí di djaluna anochi ta un otro prueba ku Refineria Isla ainda no por konta ku entrega kontinuo i sin interupshon di utilidat di parti di CRU. Den un komunikado di prensa, CRU a konfirmá ku aktualmente Refineria Isla tin un demanda relativamente abou pa utilidat. No opstante e demanda abou aki, djaluna anochi CRU a konfrontá problema ku a pone ku diripiente e preshon di airu komprimí ku ta keda entregá na Refineria Isla a baha. Pa e motibu aki, Refineria Isla ta sigui ta preokupá pa konfiabilidat di entrega di utilidat.

Refineria Isla pa fin di yüni lo pone diferente planta bèk den operashon i asina reanudá produkshon. Pa Refineria Isla aktualmente e punto di atenshon mas importante sinembargo ta keda suministro konfiabel i kontinuo di stom, awa, koriente i airu komprimí. Pa prosesá kualkier tipo òf kantidat di petroli na un manera ekonomikamente viabel, ta imperativo pa tin garantia di suministro konfiabel i kontinuo di utilidat.

Departamentu di Relashon Públiko
Refineria Isla Curaçao B.V.
djamars 19 di yüni, 2018

< Back