Start-up” di Cat Cracker i plantanan asosiá kuné

Published on February 13, 2018

Manera ta konosí, Refineria Isla tabata en espera di un kontesta di parti di CRU tokante operashon di bòiler 2 p’asina por a “start-up” nos planta di Cat Cracker. Entre tantu Refineria Isla a risibí konfirmashon di parti di CRU ku bòiler 2 ta keda den funshon. Komo ku e stom ku nos ta risibí for di bòiler 2 (CRU) aki ainda no ta sufisiente pa “start-up” nos Cat Cracker, Refineria Isla a para su planta di Crude Distiller 3 (CD3) p’asina liberá stom i yega na e kantidat di stom nesesario. Tur kos ta plania pa e aktividatnan preparativo pa “start up” di Cat Cracker kuminsá tuma lugá den transkurso di awe nochi 13 pa 14 di febrüari 2018. Despues di “start-up” di Cat Cracker seguidamente ta kontinuá ku startmentu di e otro plantanan asosiá ku Cat Cracker. E proseso total lo dura te fin di siman.

Durante e proseso di “start-up”, Refineria Isla lo tuma e medidanan di seguridat i operashonal nesesario pa garantisá un “start-up” efisiente pa asina minimalisá kualkier molèster ku e aktividat aki eventualmente por kousa. Ta premirá ku lo tuma mas o ménos tres pa kuater dia promé ku tur e plantanan envolví ta operá na un manera stabil.

Refineria Isla ta ofresé su diskulpa pa kualkier inkonbeniensia ku esaki por kousa na nos komunidat durante e dianan benidero.

Departamentu di Relashon Públiko
Refineria Isla Curaçao B.V.
13 di febrüari 2018

< Back